9 - ئاينىڭ 3 - كۈنى چۈشتىن كېيىن، دۆلەت رەئىسى شى جىنپىڭ بېيجىڭ خەلق سارىيىدا جۇڭگوغا جۇڭگو − ئافرىقا ھەمكارلىق مۇنبىرى بېيجىڭ باشلىقلار يىغىنىغا قاتنىشىش ھەم دۆلەت ئىشلىرى زىيارىتىدە بولۇش ئۈچۈن كەلگەن نىگېرىيە زۇڭتۇڭى تىنۇبۇ بىلەن سۆھبەت ئۆتكۈزدى. شىنخۇا ئاگېنتلىقى مۇخبىرى خۇاڭ جىڭۋېن فوتوسى

شىنخۇا ئاگېنتلىقى، بېيجىڭ، 9 - ئاينىڭ 3 - كۈنى تېلېگراممىسى(مۇخبىرلارما جويەن، شاۋ يىبو) 9 - ئاينىڭ 3 - كۈنى چۈشتىن كېيىن، دۆلەت رەئىسى شى جىنپىڭ بېيجىڭ خەلق سارىيىدا جۇڭگوغا جۇڭگو − ئافرىقا ھەمكارلىق مۇنبىرى بېيجىڭ باشلىقلار يىغىنىغا قاتنىشىش ھەم دۆلەت ئىشلىرى زىيارىتىدە بولۇش ئۈچۈن كەلگەن نىگېرىيە زۇڭتۇڭى تىنۇبۇ بىلەن سۆھبەت ئۆتكۈزدى. ئىككى دۆلەتنىڭ دۆلەت باشلىقلىرى جۇڭگو - نىگېرىيە مۇناسىۋىتىنى ئومۇميۈزلۈك ئىستراتېگىيەلىك ھەمراھلىق مۇناسىۋىتىگە كۆتۈرگەنلىكىنى جاكارلىدى.

شى جىنپىڭ مۇنداق كۆرسەتتى: نىگېرىيە ئافرىقىدىكى مۇھىم تەسىرگە ئىگە چوڭ دۆلەت بولۇپ، غايەت زور نوپۇس كۆلىمى ۋە تەرەققىيات يوشۇرۇن كۈچىگە ئىگە. دىپلوماتىك مۇناسىۋەت ئورناتقان يېرىم ئەسىردىن كۆپرەك ۋاقىتتىن بۇيان، جۇڭگو بىلەن نىگېرىيە باشتىن - ئاخىر ئۆزئارا ھۆرمەت قىلىپ، باراۋەر مۇئامىلە قىلىپ، بىرلىشىپ ئۆزىنى قۇدرەت تاپقۇزۇش، ھەمكارلىشىپ تەڭ نەپ ئېلىش يولىنى ئاچتى. يېقىنقى يىللاردىن بۇيان، ئىككى دۆلەت جۇڭگو − ئافرىقا ھەمكارلىق مۇنبىرى رامكىسى ئىچىدە زور بىر تۈركۈم ئۈلگىلىك، ئىستراتېگىيەلىك ھەمكارلىق تۈرلىرىنى ئورتاق يولغا قويدى. جۇڭگو يەنىمۇ ئىلگىرىلىگەن ھالدا ئىسلاھاتنى ئومۇميۈزلۈك چوڭقۇرلاشتۇرۇپ، جۇڭگوچە زامانىۋىلاشتۇرۇشنى ئىلگىرى سۈرۈۋاتىدۇ، بۇ، جۇڭگو - نىگېرىيە مۇناسىۋىتىنىڭ تەرەققىياتىغا تېخىمۇ كۆپ پۇرسەت ئېلىپ كېلىدۇ. ئىككى تەرەپ يۇقىرى سۈپەتلىك ھەمكارلىق ئارقىلىق قول تۇتۇشۇپ ھەرقايسىسىنىڭ زامانىۋىلاشتۇرۇشىنى ئىشقا ئاشۇرۇپ، جۇڭگو - نىگېرىيە مۇناسىۋىتىدە يېڭى، تېخىمۇ زور تەرەققىياتنى ئىشقا ئاشۇرۇشقا تۈرتكە بولۇشى كېرەك.

شى جىنپىڭ مۇنداق تەكىتلىدى: ئىككى تەرەپ ئىستراتېگىيەلىك ئۆزئارا ئىشىنىشنى كۈچەيتىپ، ئىستراتېگىيەلىك يۈكسەكلىك ۋە ئۇزاق مەزگىللىك نۇقتىدىن ئىككى تەرەپ مۇناسىۋىتىگە مۇئامىلە قىلىش ۋە ئۇنى راۋاجلاندۇرۇشتا چىڭ تۇرۇپ، بىر - بىرىنىڭ يادرولۇق مەنپەئىتىگە ئالاقىدار ۋە كۆڭۈل بۆلىدىغان مۇھىم مەسىلىلەردە بىر - بىرىنى قەتئىي قوللىشى كېرەك. تەرەققىيات ئىستراتېگىيەلىرىنى ئۇدۇللاشتۇرۇشنى كۈچەيتىپ، ئەۋزەللىكلەر ئارقىلىق بىر - بىرىنى تولۇقلايدىغان، ئۆزئارا مەنپەئەت يەتكۈزۈپ تەڭ نەپ ئالىدىغان ئەمەلىي ھەمكارلىق يېڭى ئەندىزىسىنى شەكىللەندۈرۈپ، ئۇل ئەسلىھە، ئېنېرگىيە، قېزىلما بايلىق بىلەن كەسىپنىڭ ھەمتۈرتكىلىك يۇغۇرما تەرەققىياتىغا تۈرتكە بولۇپ، رەقەملىك ئىقتىساد، يېڭى ئېنېرگىيە قاتارلىق يېڭى ھەمكارلىق ئېشىش نۇقتىلىرىنى يارىتىشى كېرەك. نىگېرىيە تەرەپنىڭ نىگېرىيەدىكى جۇڭگو تەرەپ خادىملىرى ۋە تۈرلىرىنىڭ بىخەتەرلىكىنى قوغدىشىنى ئۈمىد قىلىمەن. ئادىمىيەت جەھەتتىكى ئالماشتۇرۇشنى كۈچەيتىپ، ئۆزئارا چۈشىنىشنى ئاشۇرۇش كېرەك. جۇڭگو تەرەپ نىگېرىيە تەرەپنىڭ تېررورىزمغا زەربە بېرىشى، رايون مۇقىملىقىنى قوغدىشىنى، خەلقئارا ۋە رايون ئىشلىرىدا تېخىمۇ زور رول ئوينىشىنى قوللايدۇ، نىگېرىيە تەرەپ بىلەن كۆپ تەرەپلىك ھەمكارلىشىش، ماسلىشىشنى كۈچەيتىپ، تەرەققىي قىلىۋاتقان دۆلەتلەرنىڭ مەنپەئىتىنى ئورتاق قوغداشنى خالايدۇ.

شى جىنپىڭ مۇنداق كۆرسەتتى: جۇڭگو − ئافرىقا ھەمكارلىق مۇنبىرى جۇڭگو - ئافرىقا ئەمەلىي ھەمكارلىقىنى ئالغا سىلجىتىدىغان ئۈنۈملۈك مېخانىزم بولۇپلا قالماي، يەنە جەنۇب - جەنۇب ھەمكارلىقىدىكى بىر بايراق. جۇڭگو تەرەپ بۇ قېتىمقى مۇنبەر بېيجىڭ باشلىقلار يىغىنىنى پۇرسەت بىلىپ، جۇڭگو - ئافرىقا دوستلۇقىنىڭ تارىخىي تەجرىبىلىرىنى خۇلاسىلەپ، يۇقىرى سەۋىيەلىك جۇڭگو - ئافرىقا تەقدىر ئورتاق گەۋدىسى بەرپا قىلىشقا تۈرتكە بولۇپ، يېڭى دەۋردىكى جۇڭگو - ئافرىقا مۇناسىۋىتى تەرەققىياتىغا يېڭى ھەرىكەت ئېنېرگىيەسى قوشۇشنى خالايدۇ.

تىنۇبۇ مۇنداق بىلدۈردى: گۈزەل جۇڭگودا زىيارەتتە بولغانلىقىمدىن ئىنتايىن خۇشالمەن، جۇڭگو تەرەپنىڭ قىزغىن كۈتۈۋالغانلىقىغا رەھمەت ئېيتىمەن. نىگېرىيە - جۇڭگو مۇناسىۋىتى يېرىم ئەسىردىن كۆپرەك داۋاملىشىپ كەلدى، ئىككى تەرەپ ھەمكارلىقى نىگېرىيەنىڭ ئىقتىسادىي تەرەققىياتىنى ئىلگىرى سۈردى. مەن رەئىس شى جىنپىڭنىڭ نىگېرىيە - جۇڭگو مۇناسىۋىتىگە بەرگەن باھاسىنى تامامەن قۇۋۋەتلەيمەن. نىگېرىيە زور ياشلار نوپۇسى ۋە غايەت زور تەرەققىيات يوشۇرۇن كۈچىگە ئىگە. جۇڭگو ئىسلاھات - ئېچىۋېتىشتە ئۇلۇغ مۇۋەپپەقىيەتلەرنى قولغا كەلتۈردى، نىگېرىيە تەرەپمۇ ئىسلاھات - ئېچىۋېتىشنى يولغا قويۇۋاتىدۇ، نىگېرىيە بىلەن جۇڭگونىڭ ئىقتىسادىي ھەمكارلىقنى چوڭقۇرلاشتۇرۇشى، ئومۇميۈزلۈك ئىستراتېگىيەلىك ھەمراھلىق مۇناسىۋىتىنى راۋاجلاندۇرۇشى نىگېرىيەنىڭ كەلگۈسى تەرەققىياتىغا نىسبەتەن ئىنتايىن مۇھىم. نىگېرىيە تەرەپ ئۆزىنىڭ جۇڭگونىڭ ئافرىقىدىكى ئەڭ چوڭ سودا، سېلىنما ھەمكارلىق ھەمراھى بولۇشىنى ئۈمىد قىلىدۇ، تېخىمۇ كۆپ جۇڭگو كارخانىسىنىڭ نىگېرىيەگە بېرىپ مەبلەغ سېلىپ، يېزا ئىگىلىكى، ياسىمىچىلىق، قېزىلما بايلىق، ئېنېرگىيە، ئۇل ئەسلىھە قاتارلىق ساھەلەردىكى ئۆزئارا مەنپەئەت يەتكۈزۈش ھەمكارلىقىنى كېڭەيتىپ، نىگېرىيە ۋە غەربىي قىسىم ئافرىقىنىڭ زامانىۋىلاشتۇرۇش قۇرۇلۇشىغا كۈچ قوشۇپ، نامراتلىقتىن ئۈنۈملۈك قۇتۇلدۇرۇشىنى قارشى ئالىدۇ، نىگېرىيە تەرەپ بۇنى ياخشى خەۋپسىزلىك شارائىتى بىلەن تەمىنلەشنى خالايدۇ. جۇڭگو تەرەپنىڭ نىگېرىيە ياشلىرىنى مۇھىم تەربىيەلىنىش پۇرسىتى بىلەن تەمىنلىگەنلىكىگە رەھمەت ئېيتىدۇ، جۇڭگو تەرەپ بىلەن ئادىمىيەت جەھەتتىكى ئالماشتۇرۇشنى چوڭقۇرلاشتۇرۇشنى خالايدۇ. نىگېرىيە تەرەپ بىر جۇڭگو سىياسىتىگە قەتئىي ئەمەل قىلىدۇ، جۇڭگو تەرەپ بىلەن داۋاملىق تۈردە بىر - بىرىنىڭ يادرولۇق مەنپەئىتىگە ئالاقىدار مەسىلىلەردە بىر - بىرىنى قەتئىي قوللاشنى خالايدۇ. نىگېرىيە تەرەپ جۇڭگو تەرەپ بىلەن پىكىر ئالماشتۇرۇش، ھەمكارلىشىشنى قويۇقلاشتۇرۇپ، بۇ قېتىمقى جۇڭگو − ئافرىقا ھەمكارلىق مۇنبىرى بېيجىڭ باشلىقلار يىغىنىنىڭ تولۇق مۇۋەپپەقىيەتلىك بولۇشىغا تۈرتكە بولۇشنى ئۈمىد قىلىدۇ.

سۆھبەتتىن كېيىن، ئىككى دۆلەت دۆلەت باشلىقلىرى «بىر بەلباغ، بىر يول»نى ئورتاق بەرپا قىلىش ھەمكارلىق يىرىك پىلانى، يەرشارىۋى تەرەققىيات تەشەببۇسىنى ئەمەلىيلەشتۈرۈشكە تۈرتكە بولۇش، ئىقتىسادىي تەرەققىيات، بېيدوۋ سۈنئىي ھەمراھ يول باشلاش سىستېمىسىنى ئەمەلىي قوللىنىش، جۇڭگوغا خاسىڭ ئېكسپورت قىلىش، ئاخبارات تاراتقۇلىرى قاتارلىق ساھەلەردىكى كۆپ تۈرلۈك ئىككى تەرەپ ھەمكارلىق ھۆججەتلىرىنىڭ ئىمزالىنىشىغا ئورتاق گۇۋاھ بولدى.

ئىككى تەرەپ «جۇڭخۇا خەلق جۇمھۇرىيىتى بىلەن نىگېرىيە فېدېراتسىيە جۇمھۇرىيىتىنىڭ ئومۇميۈزلۈك ئىستراتېگىيەلىك ھەمراھلىق مۇناسىۋىتى ئورنىتىش، يۇقىرى سەۋىيەلىك جۇڭگو - نىگېرىيە تەقدىر ئورتاق گەۋدىسى بەرپا قىلىش توغرىسىدىكى قوشما باياناتى»نى ئېلان قىلدى.

سۆھبەتتىن ئىلگىرى، شى جىنپىڭ خەلق سارىيىنىڭ شىمالىي زالىدا تىنۇبۇ ئۈچۈن قارشى ئېلىش مۇراسىمى ئۆتكۈزدى.

ۋاڭ يى يۇقىرىقى پائالىيەتلەرگە قاتناشتى.