شىنخۇا ئاگېنتلىقى، بېيجىڭ، 3 - ئاينىڭ 27 - كۈنى تېلېگراممىسى(مۇخبىرجېڭ مىڭدا) 3 - ئاينىڭ 27 - كۈنى چۈشتىن كېيىن، دۆلەت رەئىسى شى جىنپىڭ خەلق سارىيىدا جۇڭگوغا خىزمەت زىيارىتىدە بولۇش ئۈچۈن كەلگەن گوللاندىيە باش ۋەزىرى رۇتتې بىلەن كۆرۈشتى.

شى جىنپىڭ مۇنداق كۆرسەتتى: يېقىنقى يىللاردىن بۇيان، جۇڭگو - گوللاندىيە مۇناسىۋىتى مۇقىم، ساغلام، تېز تەرەققىي قىلدى، ئىككى دۆلەتنىڭ ھەرقايسى ساھەلەردىكى ھەمكارلىقى سىجىل چوڭقۇرلاشتى، گوللاندىيە ئىسمى - جىسمىغا لايىق جۇڭگو - ياۋروپا ھەمكارلىقىنىڭ «دەرۋازا»سىغا ئايلاندى. جۇڭگو تەرەپ گوللاندىيە تەرەپ بىلەن ھەرقايسى قاتلام - دەرىجىلىكلەر ئالاقىسىنى ساقلاپ، پىكىر ئالماشتۇرۇش، سۆھبەتلىشىشتە چىڭ تۇرۇپ، ئۆزئارا مەنپەئەت يەتكۈزۈپ تەڭ نەپ ئېلىشتا چىڭ تۇرۇپ، جۇڭگو بىلەن گوللاندىيەنىڭ ئوچۇق، ئەمەلىي بولغان ئومۇميۈزلۈك ھەمكارلىق ھەمراھىلىق مۇناسىۋىتىنىڭ ئۈزلۈكسىز تەرەققىي قىلىشىغا تۈرتكە بولۇشنى خالايدۇ. جۇڭگو تەرەپ گوللاندىيەنىڭ ئەلا سۈپەتلىك تاۋارلىرىنى ئىمپورت قىلىشنى كېڭەيتىشنى خالايدۇ، گوللاندىيە كارخانىلىرىنىڭ جۇڭگوغا كېلىپ مەبلەغ سېلىشىنى قارشى ئالىدۇ، شۇنداقلا گوللاندىيە تەرەپنىڭ جۇڭگو كارخانىلىرىنى ئادىل، ئاشكارا بولغان تىجارەت - سودا مۇھىتى بىلەن تەمىنلىشىنى ئۈمىد قىلىدۇ. ئىككى تەرەپ يېزا ئىگىلىكى، سۇچىلىق، ئېنېرگىيە قاتارلىق جەھەتلەردىكى ئەنئەنىۋى ھەمكارلىقنى پائال ئالغا سىلجىتىش بىلەن بىللە، سۈنئىي ئەقلىي ئىقتىدار، يېشىل تىپ ئۆزگەرتىش، ياشانغانلار ئىقتىسادى قاتارلىق ساھەلەردىكى ھەمكارلىق يوشۇرۇن كۈچىنى ئېچىشى كېرەك. ئىككى تەرەپنىڭ خادىملارنىڭ بېرىش - كېلىشىنى قولايلاشتۇرىدىغان تېخىمۇ كۆپ تەدبىرلەرنى داۋاملىق قوللىنىپ، مائارىپ، مەدەنىيەت ۋە خەلقلەر ئارا ئالماشتۇرۇشقا ئىلھام بېرىشىنى ئۈمىد قىلىمەن. جۇڭگو تەرەپ گوللاندىيە تەرەپ بىلەن بىرلەشكەن دۆلەتلەر تەشكىلاتى، دۇنيا سودا تەشكىلاتى قاتارلىق كۆپ تەرەپلىك ئاپپاراتلاردىكى پىكىر ئالماشتۇرۇش، ماسلاشتۇرۇشنى كۈچەيتىپ، كىلىمات ئۆزگىرىشى، جانلىقلارنىڭ كۆپ خىللىقى قاتارلىق يەرشارىۋى خىرىسلارغا ئورتاق تاقابىل تۇرۇشنى خالايدۇ.

شى جىنپىڭ مۇنداق تەكىتلىدى: ئىقتىسادنىڭ يەرشارىۋىلىشىشى گەرچە تەتۈر شامالغا دۇچ كەلگەن بولسىمۇ، لېكىن تارىخىي چوڭ يۈزلىنىشى ئۆزگەرمەيدۇ، «ئىلمەكتىن ئاجرىتىپ زەنجىرنى ئۈزۈش»نىڭ چىقىش يولى يوق، ئوچۇق ھەمكارلىشىش بىردىنبىر تاللاش. جۇڭگو تەرەپ باشتىن - ئاخىر مۇنداق قارايدۇ: بىرى يېڭىپ، بىرى يېڭىلىدىغان، قارا بولمىسا چوقۇم ئاقلا دەيدىغان ئىككى مەنبەلىك قارشىلىشىش تەپەككۇرىنىڭ ۋاقتى ئاللىبۇرۇن ئۆتتى، ھەقىقىي بىخەتەر بولغان دۇنيا چوڭقۇر يۇغۇرۇلغان، ئۆزئارا تايىنىدىغان دۇنيا بولۇشى كېرەك. سۈنئىي ئۇسۇلدا پەن - تېخنىكا توسۇقى پەيدا قىلىش، كەسىپ زەنجىرى، تەمىنلەش زەنجىرىنى ئايرىۋېتىش پەقەت بۆلۈنۈش ۋە قارشىلىشىشنى كەلتۈرۈپ چىقىرىدۇ. جۇڭگو خەلقىنىڭمۇ ھەققانىي تەرەققىي قىلىش ھوقۇق - مەنپەئىتى بار، ھەرقانداق كۈچ جۇڭگو پەن - تېخنىكا تەرەققىياتىنىڭ ئىلگىرىلەش قەدىمىنى توسۇيالمايدۇ. جۇڭگو باشتىن - ئاخىر تەڭ نەپ ئېلىش ئىدىيەسىگە ئەمەل قىلىپ، يۇقىرى سەۋىيەلىك سىرتقا ئېچىۋېتىشنى سىجىل كېڭەيتىپ، ھەرقايسى تەرەپلەر بىلەن بىللە تەرەققىيات پايدىسىدىن ئورتاق بەھرىلىنىدۇ. جۇڭگو ياۋروپاغا قاراتقان سىياسىتىدە داۋاملىق مۇقىم بولۇشنى ساقلايدۇ، ياۋروپانى كۆپ قۇتۇپلاشقان دۇنيادىكى مۇھىم بىر قۇتۇپ ۋە ھەمكارلىق ھەمراھى دەپ قارايدۇ. گوللاندىيە تەرەپنىڭ داۋاملىق تۈردە جۇڭگو بىلەن ياۋروپانىڭ ئۆزئارا چۈشىنىشى، ئىجابىي مۇناسىۋەتنى راۋاجلاندۇرۇشىغا تۈرتكە بولۇش ئۈچۈن ئاكتىپ رولىنى جارى قىلدۇرۇشىنى ئۈمىد قىلىمەن.

رۇتتې مۇنداق بىلدۈردى: 2013 - يىلى مەن باش ۋەزىر بولۇش سۈپىتىم بىلەن جۇڭگودا تۇنجى قېتىم زىيارەتتە بولدۇم، بولۇپمۇ 2014 - يىلى رەئىس شى جىنپىڭ بىلەن بىللە گوللاندىيە بىلەن جۇڭگونىڭ ئوچۇق، ئەمەلىي بولغان ئومۇميۈزلۈك ھەمكارلىق ھەمراھىلىق مۇناسىۋىتى ئورناتقانلىقىنى ئورتاق جاكارلىغاندىن بۇيان، ئىككى دۆلەت مۇناسىۋىتى ياخشى تەرەققىياتنى ساقلاپ كەلدى، سودا سوممىسى بىر قاتلاندى، ئىككى تەرەپ ھەمكارلىقىدا غايەت زور يوشۇرۇن كۈچ ۋە ئىستىقبال نامايان بولدى. «ئىلمەكتىن ئاجرىتىپ زەنجىرنى ئۈزۈش» گوللاندىيە ھۆكۈمىتىنىڭ سىياسەت تاللىشى ئەمەس، چۈنكى جۇڭگونىڭ تەرەققىيات مەنپەئىتىگە زىيان يەتكۈزىدىغان ھەرقانداق قىلمىش ئوخشاشلا ئۆزىگە زىيان سالىدۇ. جۇڭگو تەرەپنىڭ گوللاندىيە پۇقرالىرىنىڭ جۇڭگوغا بېرىشىنى 15 كۈنلۈك ۋىزا كەچۈرۈم قىلىش ئىمتىيازى بىلەن تەمىنلىگەنلىكىگە رەھمەت ئېيتىمەن. گوللاندىيە تەرەپ جۇڭگو بىلەن بولغان دوستانە مۇناسىۋەتنى قەدىرلەيدۇ، جۇڭگو تەرەپ بىلەن ھەمراھلىق مۇناسىۋەتنى سىجىل چوڭقۇرلاشتۇرۇپ، خادىملارنىڭ بېرىش - كېلىشىنى قولايلاشتۇرۇپ، ئىقتىساد - سودا، كاربون قويۇپ بېرىشنى ئازايتىش قاتارلىق ساھەلەردىكى ھەمكارلىشىشنى كۈچەيتىپ، 20 دۆلەت گۇرۇھى قاتارلىق كۆپ تەرەپلىك سورۇنلار، شۇنداقلا خەلقئارا ۋە رايون قىزىق نۇقتا مەسىلىلىرىدە پىكىر ئالماشتۇرۇش، ماسلىشىشنى قويۇقلاشتۇرۇشنى خالايدۇ.

ۋاڭ يى كۆرۈشۈشكە قاتناشتى.

شىنخۇا ئاگېنتلىقى، بېيجىڭ، 3 - ئاينىڭ 27 - كۈنى تېلېگراممىسى(مۇخبىرجېڭ مىڭدا) 3 - ئاينىڭ 27 - كۈنى چۈشتىن كېيىن، دۆلەت رەئىسى شى جىنپىڭ خەلق سارىيىدا جۇڭگوغا رەسمىي زىيارەتتە بولۇش ئۈچۈن كەلگەن سىرى لانكا زۇڭلىسى گۇنناۋاردېنا بىلەن كۆرۈشتى.

شى جىنپىڭ مۇنداق كۆرسەتتى: جۇڭگو - سىرى لانكا دوستلۇقى ئۇزاق تارىخقا ئىگە، ئىككى دۆلەت خەلقلىرى تەبىئىي يېقىنلىق تۇيغۇسىغا ئىگە. جۇڭگو - سىرى لانكا مۇناسىۋىتىنى ياخشى مۇستەھكەملەش، ياخشى تەرەققىي قىلدۇرۇش ئىككى دۆلەت خەلقلىرىنىڭ تۈپ مەنپەئىتى ۋە ئورتاق ئارزۇسىغا ئۇيغۇن. جۇڭگو تەرەپ سىرى لانكا تەرەپ بىلەن بىرلىكتە، «مۇستەقىل ئۆزىنى قۇدرەت تاپقۇزۇش، ئىتتىپاقلىشىپ ئۆزئارا ياردەم بېرىش»تىن ئىبارەت «گۈرۈچ - كاۋچۇك كېلىشىمى» روھىنى داۋاملىق ئەۋج ئالدۇرۇپ، سىياسىي جەھەتتە ئۆزئارا ئىشىنىشنى مۇستەھكەملەپ، دۆلەتنى ئىدارە قىلىش تەجرىبىلىرىنى ئالماشتۇرۇشنى كۈچەيتىپ، ئەمەلىي ھەمكارلىقنى كېڭەيتىپ، «بىر بەلباغ، بىر يول»نى يۇقىرى سۈپەتتە ئورتاق بەرپا قىلىپ، جۇڭگو بىلەن سىرى لانكىنىڭ ئۆزئارا سەمىمىي ياردەم بېرىش، ئەۋلادمۇئەۋلاد دوستانە ئۆتۈشتەك ئىستراتېگىيەلىك ھەمكارلىق ھەمراھىلىق مۇناسىۋىتىنى ئۈزلۈكسىز چوڭقۇرلاشتۇرۇشنى خالايدۇ.

شى جىنپىڭ مۇنداق تەكىتلىدى: جۇڭگو تەرەپ سىرى لانكىنىڭ دۆلەتنىڭ ئىگىلىك ھوقۇقى، مۇستەقىللىقى، مىللەتنىڭ ئىززەت - ھۆرمىتىنى قوغدىشىنى، ئۆز دۆلىتىنىڭ دۆلەت ئەھۋالىغا ئۇيغۇن كېلىدىغان زامانىۋىلاشتۇرۇش يولى ئۈستىدە ئىزدىنىشىنى قەتئىي قوللايدۇ، داۋاملىق تۈردە سىرى لانكىنىڭ ئىقتىساد، جەمئىيەت تەرەققىياتىغا پۈتۈن كۈچ بىلەن ياردەم بېرىدۇ. ئىككى تەرەپ ئورتاق تىرىشچانلىق كۆرسىتىپ، «بىر بەلباغ، بىر يول»نى يۇقىرى سۈپەتتە ئورتاق بەرپا قىلىش، بولۇپمۇ كولومبو پورت شەھىرى ۋە خامبانتوتا ئۇنىۋېرسال ئېچىش تۈرىدىن ئىبارەت ئىككى چوڭ بايراقدار تۈرنى ئالغا سىلجىتىپ، ئەشيا ئوبوروتى، ئېنېرگىيە، كەسىپ ھەمكارلىقىنى چوڭقۇرلاشتۇرۇپ، رەقەملىك ئىقتىساد، يېشىل ئىقتىساد، پاكىز ئېنېرگىيە، مەدەنىيەت - ساياھەت، دېڭىز - ئوكيان ئىقتىسادى قاتارلىق ساھەلەردىكى ئالماشتۇرۇش ۋە ھەمكارلىشىشنى كۈچەيتىشى كېرەك. جۇڭگو تەرەپ سىرى لانكىنىڭ خاس ئەلا سۈپەتلىك مەھسۇلاتلىرىنى ئىمپورت قىلىشنى داۋاملىق كېڭەيتىپ، جۇڭگو كارخانىلىرىنى سىرى لانكىغا بېرىپ مەبلەغ سېلىپ كەسىپنى گۈللەندۈرۈشىگە ئىلھام بېرىشنى خالايدۇ، سىرى لانكا تەرەپنىڭ ئادىل، ئاشكارا تىجارەت - سودا مۇھىتى بىلەن تەمىنلىشىنى ئۈمىد قىلىمىز. جۇڭگو تەرەپ سىرى لانكا تەرەپ بىلەن يېزا - كەنتلەردە نامراتلارنى ئازايتىش جەھەتتىكى ھەمكارلىقنى كۈچەيتىپ، سىرى لانكىنىڭ ئىقتىسادنىڭ تىپىنى ئۆزگەرتىپ دەرىجىسىنى ئۆستۈرۈش ۋە ئىمكانىيەتلىك سىجىل تەرەققىياتنى ئىشقا ئاشۇرۇشىغا كۈچ قوشۇشنى خالايدۇ، ئىككى تەرەپ تىنچ بىللە تۇرۇش بەش پىرىنسىپىنى يەنىمۇ ئەۋج ئالدۇرۇپ، خەلقئارا ۋە رايون ئىشلىرىدا ھەمكارلىشىشنى كۈچەيتىپ، جۇڭگو - سىرى لانكىنىڭ ئورتاق مەنپەئىتى ۋە خەلقئارا ئادىللىق، ھەققانىيلىقنى ياخشى قوغداپ، ئىنسانىيەت تەقدىرى ئورتاق گەۋدىسى بەرپا قىلىشقا تۈرتكە بولۇشى كېرەك.

گۇنناۋاردېنا مۇنداق بىلدۈردى: سىرى لانكا بىلەن جۇڭگو ئەنئەنىۋى دوست. سىرى لانكا تەرەپ بىر جۇڭگو پىرىنسىپىغا قەتئىي، قاتتىق ئەمەل قىلىدۇ، جۇڭگو بىلەن بولغان دوستانە ھەمكارلىق سىياسىتىگە قەتئىي ئەمەل قىلىدۇ، جۇڭگونى باشتىن - ئاخىر تاشقى مۇناسىۋەتتە ئالدىنقى ئورۇنغا قويىدۇ. سىرى لانكا تەرەپ جۇڭگونىڭ سىرى لانكا قىيىنچىلىققا ئۇچرىغان پەيتتە ھەمىشە ياردەم قولىنى ۋاقتىدا سۇنغانلىقىنى ئۇنتۇپ قالمايدۇ، سىرى لانكا بىلەن جۇڭگو تەقدىرداش، ئېغىر كۈنلەردە بىللە بولىدىغان دوستلار. كولومبو پورت شەھىرى ۋە خامبانتوتا ئۇنىۋېرسال ئېچىش تۈرى قاتارلىق تۈرلەر سىرى لانكىنىڭ ئىقتىساد، جەمئىيەت تەرەققىياتىنى زور دەرىجىدە جانلاندۇردى، شۇنداقلا رايون ئومۇمىي تەرەققىياتىنى كۈچلۈك ئىلگىرى سۈردى. رەئىس شى جىنپىڭ ئوتتۇرىغا قويغان يەرشارىۋى تەرەققىيات تەشەببۇسى، يەرشارىۋى خەۋپسىزلىك تەشەببۇسى، يەرشارىۋى مەدەنىيلىك تەشەببۇسى دۇنيانىڭ تىنچلىقى ۋە تەرەققىياتىغا يېڭى ھەرىكەتلەندۈرگۈچى كۈچ ۋە ئاكتىپ كۈچ قوشتى، سىرى لانكا تەرەپ پائال قوللايدۇ ۋە قاتنىشىدۇ. سىرى لانكا تەرەپ داۋاملىق تۈردە جۇڭگو تەرەپ بىلەن بىرلىكتە، تىنچ بىللە تۇرۇش بەش پىرىنسىپىنى ئەۋج ئالدۇرۇپ، سىرى لانكا - جۇڭگو دوستانە مۇناسىۋىتىنى چوڭقۇرلاشتۇرۇپ، «بىر بەلباغ، بىر يول»نى ئورتاق بەرپا قىلىشنى ئالغا سىلجىتىپ، ئىقتىساد - سودا، مائارىپ، ساياھەت، نامراتلارنى ئازايتىش قاتارلىق ساھەلەردىكى ھەمكارلىقنى كېڭەيتىپ، خەلقئارا كۆپ تەرەپلىك پىكىر ئالماشتۇرۇش، ھەمكارلىشىشنى قويۇقلاشتۇرۇپ، ئاسىيا تەقدىر ئورتاق گەۋدىسى ۋە ئىنسانىيەت تەقدىرى ئورتاق گەۋدىسى بەرپا قىلىشقا تۈرتكە بولۇشنى خالايدۇ.

ۋاڭ يى كۆرۈشۈشكە قاتناشتى.